بارباڈوس میں سمندری طوفان بیریل گزشتہ روز شدت اختیار کر گیا جس کے سبب بارباڈوس ہوائی اڈے کو بند کر دیا گیا ہے اور ٹی20 ورلڈکپ جیتنے والی بھارتی ٹیم ایونٹ ختم ہونے کے بعد بھی ہوٹل میں مزید ٹھہرنے پر مجبور ہوگئی۔

رپورٹس کے مطابق سمندری طوفان 'بیرل' آج بارباڈوس سے ٹکرائے گا، لہٰذا بارباڈوس ایئرپورٹ بند کردیا گیا ہے اور پروازیں بھی منسوخ کی جا رہی ہیں۔

T20ورلڈکپ جیتنے کے بعد بھارتی کرکٹرز کا اسٹیڈیم میں بھنگڑا

بھارتی کرکٹرز ٹی ٹوئنٹی ورلڈکپ اپنے نام کرنے کے بعد بے قابو ہوگئے

قبل ازیں بیرل کو تیسرے درجے کا سمندری طوفان قرار دیا جارہا تھا، جس کے بارباڈوس سے ٹکرانے کے بعد تباہ کن اثرات کا خدشہ ظاہر کیا گیا تھا۔

تاہم بھارتی اسپورٹس جرنلسٹ وکرانت گپتا کے مطابق بیرل طوفان اب مزید شدت اختیار کر چکا ہے اور اسے اب چوتھے درجے کا سمندری طوفان قرار دیا جارہا ہے۔

وکرانت گپتا نے 'ایکس' پر تازہ پوسٹ میں کہا کہ 'بارباڈوس ایئرپورٹ بند کر دیا گیا ہے اور وہاں کرفیو جیسی صورتحال ہے، کسی کو باہر نکلنے کی اجازت نہیں ہے'۔

انہوں نے مزید بتایا کہ 'اگلے چند گھنٹوں میں بیرل طوفان کے بارباڈوس سے ٹکرانے کا امکان ہے اور بھارتی ٹیم ہوٹل کے اندر ہی رہے گی'۔

اُن کا کہنا تھا کہ 'کچھ معلوم نہیں کہ آئندہ 24 گھنٹوں میں کیا ہوگا، (بھارتی ٹیم کے) ٹریول پلان کے بارے میں فی الحال کچھ یقین سے نہیں کہا جاسکتا'۔

واشنگٹن پوسٹ کے مطابق بیرل طوفان 130 میل فی گھنٹہ کی رفتار سے چلنے والی ہواؤں کے ساتھ بارباڈوس سے ٹکرائے گا۔