کراچی کے شہری نے 10 کروڑ روپے مالیت کی نمبر پلیٹ خرید لی

کہاوت ہے کہ شوق کا کوئی مول نہیں ہوتا اور اس بات کو ثابت کردکھایا کراچی کے ایک بزنس میں نے جنہوں نےمحکمہ ایکسائز سندھ کی جانب سے پریمیئم نمبر پلیٹوں کی نیلامی کی تقریب میں 10 کروڑ روپے کی نمبر پلیٹ خریدلی۔

‏کراچی کے مقامی ہوٹل میں حکومتِ سندھ کی جانب سے پاکستان کی تاریخ میں پہلی مرتبہ محکمہ ایکسائز سندھ نے پریمیئم نمبر پلیٹوں کی نیلامی کی تقریب منعقد کی ۔

محکمہ ایکسائز کی جانب منعقد نمبر پلیٹس کی نیلامی کے دوران ‘مزمل کریم‘ نامی بزنس میں کی جانب سے سب سے زیادہ بولی لگاکرپریمیئم نمبر پلیٹ اے ون (A1) 10 کروڑ روپے میں خریدلی گئی جس کے بعد سینئر صوبائی وزیر شرجیل انعام میمن نے مزمل کریم کو نمبر پلیٹ کا اونرشپ سرٹیفکیٹ دیا۔

اس موقع پر تقریب سے خطاب کرتے ہوئے سینئر صوبائی وزیر شرجیل میمن نے کہا کہ ‘تقریب کا مقصد الیٹ کلاس کو نوازنا نہیں بلکہ ایک نوبل کاز ہے۔ نیلامی سے حاصل رقم سیلاب زدگان کے مکانات بنانے میں وقف کی جائےگی اور فنڈز سے سیلاب زدگان کے لیے مجموعی طور پر 2251 مکانات تعمیر کیے جائیں گے‘۔

واضح رہےمحکمہ ایکسائز سندھ نے پاکستان میں پہلی مرتبہ نمبر پلیٹس کی نیلامی کا انعقاد کیا جس میں حیرت انگیز طور پر 40 نمبرپلیٹس کی نیلامی سے67 کروڑ 54 لاکھ روپےجمع ہوئے۔