شیخ رشید کو بجلی کے بعد گیس کے بل کا بھی بڑا دھچکا

سابق وفاقی وزیر و سربراہ عوامی مسلم لیگ شیخ رشید بجلی کے بعد گیس کا بھی بھاری بل آنے پر تلملا اٹھے۔

بھاری یوٹیلیٹی بلز سے پریشان شیخ رشید نے سوشل میڈیا پر ویڈیو پیغام جاری کرکے اپنے دل کی بھڑاس نکالی۔

ویڈیو میں سابق وفاقی وزیر نے بتایا کہ اُن کا گیس کا ایک لاکھ روپے کا بل آ گیا جبکہ انہیں پہلے ہی ایک لاکھ 68 ہزار روپے کا بجلی کا بل موصول ہوچکا ہے۔

شیخ رشید نے کہا کہ 'میں صبح کا ناشتہ ریڑھی پر کرتا ہوں، جب سے اسلامی دوست مجھے 40 دن کے چلے پر لے گئے تب سے گھر میں دوپہر کا چولہا نہیں جلا، صرف شام کو کھانا پکتا ہے لیکن میرا گیس کا بل ایک لاکھ روپے آگیا ہے، میرے محلے میں شہریوں کا گیس کا بل 4 ہزار سے 8 ہزار تک آیا ہے۔

انہوں نے کہا کہ ملک کے ذمہ داران سن لیں گلی محلوں میں اندھا انقلاب پرورش پا رہا ہے، لوگ بے بس ہوگئے، حلق سے فلک تک مہنگائی نے زندہ دفن کر دیا، ملک ڈوب رہا ہے، سمجھنے کی ضرورت ہے، گاڑی ہاتھ سے چھوٹ رہی ہے، وقت کسی کا نہیں ہوتا۔

سابق وفاقی وزیر کا کہنا تھا کہ یہ چور ڈاکو لٹیرے صرف اپنے کیس ختم کرانے آئے تھے، غریب کا چولہا بجھا دیا، اب فارم 45 اور 47 کی لڑائی نہیں، غریب کے زندہ رہنے کی جستجو ہے، ذمہ دار حلقے خدا کیلئے غریب کو مرنے سے بچائیں۔

یاد رہے کہ چند روز قبل شیخ رشید نے ڈسٹرکٹ کورٹ میں میڈیا سے گفتگو کے دوران یہ شکوہ کیا تھا کہ 'میرا بجلی کا بل 1 لاکھ 68 ہزار روپے آگیا ہے، بجلی کا بل زیادہ آنے کی وجہ سے میری مارکیٹ میں دکانیں بھی خالی ہوگئی ہیں'۔